"هيتحبس"..تامر حبيب يوجه رسالة للجمهور بشأن"الست" لمنى زكي

 وجه المؤلف تامر حبيب، رسالة شديدة اللهجة لكل من ينتقد أو يتلفظ بإهانة تجاه الفنانة منى زكي بشأن فيلم "الست" سيواجه بالقانون.

وقال تامر حبيب: "فيلم الست اتعرض في مهرجان مراكش السينمائي الدولي ولاقى استحسان و إعجاب منقطعي النظير والجمهور قعد يسقف وهو مبهور ومتأثر وشديد الإعجاب، وإن شاء الله هيعرض عرض تجاري في كل الدنيا بدءا من يوم ١٠ ديسمبر، وساعتها اللي حابب يشوف الفيلم هيدخل يشوفه، واللي بعد ما يشوف الفيلم كله مش حتة منه ولا إعلان عنه هيبقى كون رأي في الفيلم ويا إما هيحبه أو احتمال ميحبوش وأكيد ليه مطلق الحرية في ده". 

وتابع حبيب: "وارد جدا إن اللي اتفرج ده يحب يقول رأيه سواء حب الفيلم أو محبوش.. من حقه يقول رأيه وانطباعه بكل أدب و احترام وبدون تطاول ولا سب ولا قلة تربية وسفالة، واللي مش هيعرف يحترم نفسه لمجرد أنه شخص سافل أو مريض أو مزقوق أو  لجان أو قذر وزبالة، هيبقى من حق النجم أو النجمة أو الفنان أو الفنانة اللي اتعرض للإهانة وشعر بأذى نفسي، أنه يرفع على الرمة التاني ده قضية ويسجنه و ساعتها لسانه ده هيتشل جوه بقه وهيخاف السايب لا يتهان زي ما اتهان المربوط أو المسجون أو المتغرم مبلغ وقدره".

وأضاف تامر حبيب: "و الحكاية دي حصلت كتير قبل كده، وآخرهم ثلاث قضايا كسبتهم منى زكي على 3 سفلة قلوا أدبهم، واخدلي بالك مين؟.. النجمة الممثلة شديدة الموهبة والاحترام والأدب  منى زكي، ست الستات".